08 Dec 2019   |   
logo
खेलकुद / मनोरञ्जन

१३ औं सागको दोस्रो दिन नेपालले जित्यो १५ स्वर्ण हेटौंडाका सञ्जीव र मनहरीका महसुसले पनि स्वर्ण जिते



खेलकुद / मनोरञ्जन   75 पटक पढिएको   समाज संवाददाता     
हेटौंडाः १३ औं दक्षिण एसियाली खेलकुद (साग) को दोस्रो दिन २४ स्वर्णको छिनोफानो हुँदा नेपालले १५ वटा जितेको छ । नेपालले कराँते र तेक्वान्दोमा ७–७ र ट्रायथोलनमा एक गरी १५ स्वर्ण जितेको हो । त्यस्तै कराँतेमा २ र तेक्वान्दोमा १ रजत जितेको नेपालले तेक्वान्दोमा ३ र ट्रायथलनमा १ कास्य पदक पनि जितेको छ । घरेलु मैदानमा भएको सागमा नेपाललाई पहिलो स्वर्ण करातेका मण्डेकाजी श्रेष्ठले दिलाए । पुरुष एकल कातामा २० वर्षपछि नेपाललाई स्वर्ण दिलाएका उनले टिम कातामा पनि प्रवीण मानन्धर र महसुस तामाङसँग मिलेर स्वर्ण जिते । महसुस मकवानपुरको मनहरी गाउँपालिकावासी हुन् । यससँगै उनले १३ औं सागमा दुई स्वर्ण जित्ने पहिलो खेलाडी समेत बन्न सफल भए । तेक्वान्दोकी आयशाले पनि सोमबार नै दुई स्वर्ण जितिन् । ११ औं सागमा स्वर्ण जितेकी उनले पहिलो पटक सागमा समावेश भएको पुम्सेको एकल र टिममा प्रतिस्पर्धा गरेकी थिइन् । र, दुबैतर्फ स्वर्ण पदक जित्न सफल भएकी छन् । दुई सन्तानकी आमा आयशा भन्छिन, ‘दुई बच्चाका लागि मेडल जितेको जस्तो भयो ।’ आयशासँगै पुम्से कातामा हेटौंडाका सञ्जीव ओझाले पनि स्वर्ण जितेका छन् ।



नेपालले सोमबार जितेको १५ मध्ये ७ स्वर्ण कराँतेबाट रह्यो । मण्डेकाजीले एकल र प्रविण मानन्धर र महसुस तामाङसँग मिलेर टिम कातामा स्वर्ण जितेका छन् । यस्तै महिला टिम कातामा निर्मला तामाङ, संगिता मगर र सरु कार्कीको टिमले स्वर्ण जित्यो । महिला एकल कातातर्फ चञ्चला दनुवारले रजत जितेकी छन् । कुमुतेतर्फ पनि नेपालले चार स्वर्ण जित्यो । पुरुषतर्फ ५५ केजीमुनी लक्ष्मण तामाङ र ८४ केजीभन्दामाथि विप्लवमान श्रेष्ठले स्वर्ण जिते । महिलातर्फ ४५ केजीमुनी कुशुम खड्का र ५० केजीमुनी अनु अधिकारीले स्वर्ण जितेकी छिन् । ८४ केजीमुनी प्रतिस्पर्धा गरेका दिवस श्रेष्ठ भने फाइनलमा पराजित हुन पुगे । उनले रजतमा चित्त बुझाए ।

सागमा पहिलो पटक पुम्से समावेश गरिएको थियो । र, यसमा नेपालको प्रभावशाली प्रदर्शन रह्यो । कुल १३ स्वर्णको छिनोफानो हुँदा नेपालले ७ वटा जित्यो । आयशा शाक्य एकल र टिमतर्फ जितिन् । यस्तै १७ देखि २३ वर्षको समूहमा सीना मादेन, २३ देखि २९ वर्ष समूहमा पार्वती गुरुङले स्वर्ण जितेकी छन् । पुरुषतर्फ २३ देखि २९ वर्ष समूहका कमल श्रेष्ठले पनि स्वर्ण पदक जितेका छन् । यसैगरी पुम्सेको कटिमतर्फ १७ देखि २३ वर्ष उमेर समूहमा निशा दर्नाल, स्वस्तिमा तामाङ र रञ्जिला तिमल्सिना तथा २३ देखि २९ वर्ष उमेर समूहमा नीता गुरुङ, प्रशंसा क्षेत्री र सुशीला राईको टिमले नेपाललाई स्वर्ण पदक दिलाएको छ । यस्तै १३ औं दक्षिण एसियाली अन्तर्गत पोखरामा हुने खेलको सोमबार औपचारिक सुरुआत भएको छ । गण्डकी प्रदेश मुख्यमन्त्री पृथ्वीसुब्बा गुरुङले पोखरा रंगशालामा भव्य समारोहबीच साग उद्घाटन गरेका हुन् । राष्ट्रिय झन्डा ट्रायथोलन खेलाडी सोनी गुरुङले बोकेकी थिइन् । पोखरामा सुरु भएका खेलमध्ये सोमबार बिहान लेकसाइडमा भएको ट्रायथोलन खेलमा पोखराबाट पहिलो स्वर्ण विजेता भएको हैसियतले उनलाई झन्डा बोक्न दिइएको हो । अनलाइनको सहयोगमा ।







सम्पर्क
समृद्ध समाज दैनिक
मानसचोक, हेटौंडा-२, मकवानपुर
०५७-५२६८३०
sambridhasamaj@gmail.com


18977695 Times Visited.
हाम्रो समुह
सुरेश श्रेष्ठ, सम्पादक, ९८५५०-६८२२७
more...
संचालन तथा प्रायोजनको हक सर्बाधिकार © समृद्ध समाज दैनिक २०७५ मा सुरक्षित रहनेछ ।
Powered by: ExNet  
Top